राप्ती सोनारी, चैत्र १२,
बाँकेको नरैनापुर गाउँपालिका वडा न. ४ जयराम पुरुवामा आगलागी हुँदा ५० लाख बराबरको क्षति भएको छ । चलेको हावाहुरीका कारण दिउँसो २ ः ३० बजे नन्कु खाँ को घरबाट आगलागी सुरु भएर १० वटा घर जलेर खरानी भएको हो । १० वटा घर जल्दा ५० लाख बराबरको क्षति भएको र १७ परिवार घरबार विहिन बनेको स्थानीय पत्रकार विनय दिक्षितले जानकारी दिएका छन् । नन्कु खाँ संगै,राजु खाँ, जुमाई खाँ, सिपाही लाल यादव,होली राम यादव, राम मनोहर यादव,भोटी अहिर, राम किशोर यादव, हेमराज यादव,किसारा यादव, राम गोपाल यादव,राम प्रघर यादव, सुमिरन यादव, प्रवेश यादव, खेमराज यादव,पवन कुमार यादव र राधेश्याम यादवको घर पुर्ण रुपमा जलेर खरानी भएको ईलाका प्रहरी कार्यालय भगवानपुरले जनाएको छ । भगवानपुरका प्रहरी इन्चार्ज प्रहरी निरिक्षक राजेन्द्र रायमाझीका अनुसार प्रहरी, सशस्त्र प्रहरी, स्थानीय बासिन्दा र नेपालगन्ज, कोहलपुर बाट गएको २ वटा दमकलले २ घन्टा पछि आगो नियन्त्रणमा लिएको थियो । मानविय क्षति नभएपनि लत्ता कपडा र महत्वपुर्ण कागजात, घर, अन्न जलेर नष्ट भएको प्रहरी निरिक्षक रायमाझीको भनाई छ ।
