१ माघ, लमही । माघे संक्रान्तिको अवसरमा दाङ देउखुरीको रिहारमा मेला लागेको छ ।
बगरबाबा धार्मिक पर्यटकीय क्षेत्र रिहारमा गएरातिदेखि नै घुइँचो छ ।
आज बिहानै तातोपानीको कुण्डमा नुहाउने पूजा गर्ने क्रम चलिरहेको छ । नुनिलो स्वादको तातोपानीमा नुहाउँदा रोग नलाग्ने विश्वास छ ।
रिहारको कुण्डमा पूजा गरी बगारबाबा मन्दिरमा पूजा गर्नाले मनोकांक्षा पूरा हुने, निःसन्तानले सन्तान पाउने र रोगब्याध नलाग्ने धार्मिक विश्वास छ ।
नेपाल सरकारले लमही नगरपालिकामा बगरबाबा धार्मिक पर्यटकीय स्थललाई एकसय नयाँ तथा विकास गरिनुपर्ने पर्यटकीय गन्तव्यको सूचीमा राखेको छ । रिहार अवधीभाषी यादव समुदाय र थारु समुदायको पवित्र धार्मिक स्थलको रुपमा परिचित छ ।
बगार बाबा धार्मिक स्थल उत्पत्तिको सन्दर्भ द्वापरयुगसँग जोडिएको छ । द्वापर युुगमा ऋषिमुुनीहरुले बिहार गरेको हुुँदा ‘ऋषि विहार’बाट अपभ्रम्स भई ‘रिहार’ नाम रहन गएको बताइन्छ ।
पूर्वपश्चिम राजमार्गसँगै जोडिएको रिहारमा माघीमा एक हप्तासम्म मेला लाग्ने गर्दछ । यो लमही बजारबाट करिब २० किलोमिटर पश्चिममा पर्दछ ।
