बुधबार, १४ साउन /काठमाडौं । सरकारले आफूहरूको पीडामा ध्यान नदिएको भन्दै मिटरव्याज पीडितहरूले बुधबार काठमाडौंमा कालो पट्टी बाँधेर विरोध प्रदर्शन गरेका छन्। सिरहाको विभिन्न स्थानीय तहका मिटरव्याज पीडितहरू काठमाडौं आएर न्यायको माग गर्दै सडकमा उत्रिएका हुन्।
उनीहरूले सिरहाका मिटरव्याज साहूहरूलाई कारबाही गर्न माग गर्दै सरकारसमक्ष आवाज उठाएका छन्। “सरकारले हाम्रो पीडा सुनेको छैन, न्याय पाउन हामीलाई बाध्य भएर प्रदर्शन गर्नुपरेको हो,” उनीहरूले गुनासो गरे।
पीडितहरूका अनुसार, लहान नगरपालिका ३ का मिटरब्याजी साहु रामलोचन गुप्ता र लहान ७ का राम कुमार महतो (रामबाबु) ले ऋण दिँदा जग्गा पास गरी पाँच/पाँच लाख ऋण लिएको तर २१ लाख पैसा बुझाउँदा समेत जग्गा फिर्ता नगरेको उनीहरुको आरोप छ।
